ලෝ පුරා රැව් නගා හේළි නාද පා
"ඔය ළමයට මේ සිංදුව කියන්න පුළුවන්ද....?"
ඒ ඇසූ විදියට මා තිගැස්සුණා. හොඳ වෙලාවට එතැන මර්සලින් ජයකොඩි පියතුමා හිටියේ. ඒ වෙලාවෙම පියතුමා නැගිටලා කිව්වා
"පව්, බය කරන්න එපා.. ඒ ළමයට හොඳට සිංදු කියන්න පුළුවන්. අපි දීලා බලමු"
ඒ අවසරයෙන් මම සිංදුවේ මුල ටික කියලා පෙන්නුවා.
"ලෝ පුරා රැව් නගා හේළි නාද පා
ලක් රෙදෙව්ව කිත් සදා සදා දිනේ දිනේ"
මේ ගීතය ගයන අතරතුර මා බලා සිටියේ මුලදී නොරිස්සුම්ව බලා සිටි සුනිල් සාන්තයන්ගේ මුහුණ ක්‍රම ක්‍රමයෙන් මගේ ගායනයෙන් සැහැල්ලුවට පත්ව සතුටින් සන්සුන් වන ආකාරය දෙසයි.
"හිතුවට වඩා හොඳට මේ ළමයා ගීතය ගායනා කළා. යමු අපි හයවෙනි මැදිරියට ගීතය පටිගත කරන්න..."
[[ උපුටාගැනීම හඬ ගුවන් විදුලි සඟරාව 2013 අප්‍රේල් - ජූනි 2 කාණ්ඩය 10 කලාපය 114 පිටුව ]]
1925 දෙසැම්බරයේදී කොළඹින් කතාකරමි (Colombo Calling) ලෙස ආරම්භ වූ ගුවන් විදුලිය 1949 අප්‍රේල් පළමුවැනිදා ලංකා ගුවන් විදුලි දෙපාර්තමේන්තුව (Department of Broadcasting / Radio Ceylon) නමින් ස්ථාපිත කෙරුණා. 1951 ජනවාරි මාසයේදී ගුවන් විදුලියට වසර 25ක් පිරීම නිමිත්තෙන් නිර්මාණය වුණු ආසිරි ගීතයයි "ලෝ පුරා රැව් නගා හේළි නාද පා" ගීතය. සුනිල් සාන්තයන් සමග ඉන්ද්‍රාණි විජයබණ්ඩාර ගැයූ මේ ගීතය රචනා කර ඇත්තේ හෙළ හවුලේ එවකට ප්‍රධාන සාමාජිකයෙක් වූ පණ්ඩිත ගුණපාල සේනාධීරයන්. ගීතයේ තනුව සහ සංගීතය සුනිල් සාන්තයන්ගේම යි.
එකල සිටි විශිෂ්ටතම ගායකයා වූ සුනිල් සාන්ත සමග යුග ගීතයක් ගැයීමට ලැබීම තම ජීවිතයේ වාසනාවක් කොට ඇය සලකන්නීය. සුනිලුන් බොහෝ කොට යුග ගීත ගැයුවේ චිත්‍රා සෝමපාල සමඟය. මේ ගීතය පටිගත කරන කාලයේ චිත්‍රා සිටියේ ඉන්දියාවේ නිසා ඉන්ද්‍රාණිට ඒ අවස්ථාව ලැබී ඇත.
[[ උපුටා ගැනීම - ලංකාදීප 2017 ඔක් 04 වන බදාදා ]]
ඉන්ද්‍රාණි විජයබණ්ඩාර මහත්මිය පවසන ආකාරයට මේ ගීතය ගායනා කරන විට ඇගේ වයස අවුරුදු 10ක් වත් නොවේ. ඉහත ලංකාදීප පුවත්පතේ සඳහන් වන්නේ ඇය උපන්නේ 1940 ජූලි 15 බව වුනත් වෙනත් බොහෝ තැන්වල සඳහන් වන්නේ ඇය උපන්නේ 1936 ජූලි 15 බවයි. එසේ බලන විට මේ ගීතය ගායනා කරන විට ඇගේ වයස අවුරුදු 14ක් පමණ වී ඇතැයි නිගමනය කළ හැකියි.
පසු කාලිනව ඇය ගුවන් විදුලි ගීත නාටක, ගුවන් විදුලි සරල ගී වැඩ සටහන්, චිත්‍රපට, ග්‍රැමපෝන් තැටි, ඊ.පී. තැටි, කැසට් පට සහ සංගත තැටි වෙනුවෙන් ගීත විශාල සංඛ්‍යාවක් ගායනා කර තිබෙනවා. පසුගියදා අපෙන් වියෝවුණු එතුමිය 1997 වසරේදී කඳුරට ගුවන් විදුලියේ චූලාභය ශාන්ත කුමාර හේරත් සහෘදයා සමග කළ පිළිසඳරක් මේ.